أصل التيك تونيك مغربي و ملهمته تا شينويت

 

بلافران/ لمغوبش ولد الوقت

 المغرب من الدول الأكثر انفتاحا على الثقافات اللي كا تجي من برا، و استطاع الشباب المغربي يعطي نكهة مغربية لعديد من الثقافات، مثلا الراب و الهيب هوب شفناه فين وصل في المغرب حيث عوض الأغنية الملتزمة و لا عندو عشاق كثار جدا ولات الفقرات ديال أي مهرجات خاص إكون فيها الراب، و كذلك الروك اللي تا هو لقا طريقوا و راه غادي مزيان بفضل مجهودات الدراري ديال الدومين.

كاين واحد الستيل اللي تا هو دخل للمغرب و هاد الستيل جديد بحد ذاتو حيث كا يقولو بأنه بان في فرنسا و بالضبط في 2002 و هو بالأساس يعتمد على الرقص على الموسيقى الإلكترو، يعني الدانس إلكترو و اللي هو شطيح على موسيقى روبوتيك يصممها لي دي جي المختاصين فيها.هاد الستايل بدون شك عرفتون، نعام هو التيك تونيك.

نرجعو للمغرب حيث و لا هاد الستايل منتشر بالبزاف خصوصا عند المراهقين اللي ولا عندهم نوادي خاصة كا يترنيو فيها على الرقص ديالهم و لات تا الكسوة ديالهم كا تباع و عليها إقبال كبير جدا، و إلى كان الراب و الروك لا يستقطب كثيرا الفتيات العكس بالنسبة لتيك تونيك فالأغلبية ديال البنات عندنا يفضلونه. محيت كما كا يقولو كا يحافض على الأنوثة عكس الستايلات الأخرى. و رغم الانتقادات الكثير اللي تيتعرض لها أصحاب هاد الستيل من قبيل راه ستيل ديال المثليين جنسيا و أنه غير تخربيقة و ما نافع فوالو حيث وصل الحد كاع باش خرجو شعار على صحاب هاد الستيل و كا يقولو التك تنيكو التيك تونيكا واش هادا دري و لا مونيكا. و كاين بزاف ما يتقال مزال.

 فالحقيقة  ماجناش اليوم نهدرو على هاد الستيل واش ضده و لا معه و لكن جنا محيت كتشفنا أن هاد الستيل الجدور ديالو و القواعد ديال الرقص ديالو جاية من المغرب، أه من المغرب تيقو و لا ما  تيقوش حنى غا نتبثو لكم بالدليل القاطع الإخوان و الأخوات هادشي اللي تا نقولو.

الكل كا يعرف الفنانة القديرة تا شنويت و ما قدمته للفن الأمازيغي و المغربي و الكل كا يعرف الرقصات ديالها و حركاتها و تا شنويت كانت هي الملهم لناس ديال التيك تونيك و داو منها غالب الحركات اللي تا يديرو فالرقص ديالهم و غير سماوه التيك تونيك، و راه من حق تاشينويت الدير عليهم شي دعوة قضائية كاع على الشفرة اللي شفروها بدون ما يستاشروها و لولها لما كان هاد الإنتشار ديال هاد الستيل بهاد الطريقة لكبيرة.

حيث الإنسان  إلى لاحظ مزيان الحركات ديال الناس ديال التيك نونيك و الحركات ديال تاشنويت غا يلقى أن هناك واحد التشابه كبير جدا و كاين غير واحد التغير صغير في اللباس و صافي.

و ها هو واحد الفيديو يؤكد داكشي اللي كا نقولو باش ما تقولوش أن بلا فران غير كا يزيدو عليكم و كان على مالين هاد الستيل يسيموه التييك شينويت و راه خاص ما نسكتوش و نردو الإعتبار للفنانة تاشينويت.