لامود الجديدة ''أنا وطني

زيزوار : لامود الجديدة ''أنا وطني''

بواسطة في 2011/1/8

سامي المغربي   هاد السنين التالية بانت واحد لامود جديدة، التحقوا بيها كاع الشلاهبية، و الحترافة، و لحاسين الكابة، و الشواذ سياسيا... لتاحقوا بيها افواجا افواجا. هاد لامود سميتها ''أنا وطني''، أو كيفما كيعجبني نسميها ''تمخازنيت''. يعني بديريكت استغلال ''الوطن'' و ''الحب ديال الوطن'' و التعلق ب''الوطن''، باش يحسنوا و ضعيتهم الاجتماعية أو السياسية أو الفنية. و كذالك وضعية ولادهم و عيالاتهم و تريكتهم المصونة. و المشكل لكبير، هو أن هاد لمود جرات معاها، بزاف ديال الطحالب و المستحتات، من ''فنانين'' و ''مثقفين'' و ''صحافيين''، حتا ولا بنادم ما كيفرقش ما بين لهضرة ديال مصطفى العلوي، قيدوم الغياطين في المغرب، و ما بين الهضرة ديال شي صحافيين، فشي جرائد كتقول على راسها ''مستقلة''، زعما مستقلة عن هموم المزاليط. و كايولي عندهم أي واحد، كينتاقد، أو لا كايقول واك واك الحق أمولاي عبد الحق، خائن و عميل لجهات اجنبية، و اخا هو جامي خرج من الحومة لي ساكن فيها. و معندوش حس ''وطني''، و كيسيئ لسمعة ديال لبلاد، بحال الى خلاو لهاد لبلاد شي سمعة يتخاف عليها. راه الوطنية الحقيقية، هي فالمقام الأول، فضح هاد الشلاهبية و الشفارة و مشتقاتهم، لي كيستنزفوا الخيرات ديال لبلاد، و كيمصوا دم لعباد، و يزوروا تاريخ لجداد، و باغيين يرجعوا هاد لبلاد بورديل و حبس كبير. و بزاف عليكم الوطنية، و باراكا عليكم غير تكونوا بنادم.